मुख्यमंत्री उद्धव ठाकरे यांनी पंतप्रधान नरेंद्र मोदींबरोबर झालेल्या बैठकीनंतर राज्यातल्या जनतेला संबोधित केलं.
महाराष्ट्रात किमान 30 एप्रिलपर्यंत लॉकडाऊन कायम राहिल, असं त्यांनी जाहीर केलं.
त्यांनी मांडलेले मुद्दे -
- राज्यात संचारबंदीपासून सुरुवात करण्यात आली आणि आता आपण लॉकडाऊनपर्यंत आलो आहोत. मुंबईत जिथं जिथं कोरोनाचे रुग्ण सापडले, ते भाग पूर्णत: सील केले आहेत.
- कोरोनाचे रुग्ण कुणाच्या संपर्कात आले, याची नोंद ठेवण्याचं काम राज्यातील महापालिका करत आहेत.
- राज्यात 33 हजार कोरोनाच्या चाचण्या झाल्यात. यात मुंबईत 19 हजार चाचण्या झाल्या. यापैकी 1 हजार जणांना कोरोनाची लागण झालीय.
- या सोमवारी राज्यातील पहिला रुग्ण आढळून 5 आठवडे पूर्ण होतील. यापुढे एकसुद्धा रुग्ण वाढता कामा नये. कोरोनाचा संसर्गातून निर्माण झालेली साखळी आपण तोडत आहोत.
- 14 एप्रिलनंतर महाराष्ट्रात लॉकडाऊन कायम ठेवणार. शेतीच्या कामाला लॉकडाऊनमध्ये परवानगी आहे. ती तशीच चालू राहिल. तसंच जीवनावश्यक वस्तूंचा पुरवठा सुरू राहणार.
- 14 एप्रिलपासून 30 एप्रिलपर्यंत महाराष्ट्रात लॉकडाऊन कायम राहिल.
- किमान 30 एप्रिलपर्यंत लॉकडाऊन राहिल, किमान शब्द मी काळजीपूर्वक वापरतोय. कारण 30 एप्रिलनंतर परिस्थिती कायम राहिल्यास काही ठिकाणी बंधनं अधिक कडक करावी लागतील.
- लॉकडाऊन कधीपर्यंत चालेल हे आपल्या हातात आहे. शिस्त पाळली आणि संसर्गाची साखळी तोडली तर आपण त्यातून लवकर बाहेर पडू.
- आपण शिस्त पाळली, तर भविष्यात आपला देश जागतिक महासत्ता बनू शकते. अमेरिका आताच आपल्याकडून औषध मागत आहे.
***
