हिंगोली दि.05: येथील राज्य राखीव बलातील बंदोबस्ताहून आलेल्या 36 जवान आणि जिल्हा सामान्य रुग्णालय, हिंगोली येथे कार्यरत एक परिचारिका असे एकूण 37 जणांना कोवीड-19 ची लागण झाल्याचा अहवाल आज प्राप्त झाला आहे.
हिंगोली येथे राज्य राखीव बलातील एकुण 83 जवानांना कोवीड-19 ची लागण झाल्याचे स्पष्ट झाले असून यामध्ये राज्य राखीव बल, जालना येथे कार्यरत असलेल्या एका जवानांचा समावेश आहे. त्यातील 35 जवान हे मालेगाव तर 48 जवान हे मुंबई येथे बंदोबस्तासाठी कार्यरत होते. तर जालना राज्य राखीव बल येथील जवानाच्या संपर्कात आलेले 02 व्यक्ती, सेनगाव येथील 01 बालक, बार्शी येथून वसमत येथे आलेला 01 व्यक्ती आणि सेनगाव येथील रुग्णांच्या संपर्कात आल्याने 01 रुग्ण आणि जिल्हा सामान्य रुग्णालय, हिंगोली येथे कार्यरत 24 वर्षीय 01 परिचारिका असे एकूण 89 कोरोनाबाधित रुग्ण आहेत.
या सर्व रुग्णांवर तज्‍ज्ञ डॉक्टरांमार्फत औषधोपचार करण्यात येत असुन, सर्वांची प्रकृती स्थिर असून, त्यांना कुठल्याही प्रकारची गंभीर लक्षणे सद्यस्थितीत नाहीत. जिल्ह्यात रुग्णांची संख्या वाढत असल्याने नागरिकांनी आता सतर्क राहण्याची आवश्यकता आहे. कोरोना विरुध्द लढ्यासाठी सोशल डिस्टन्सींगच्या नियमाचे पालन करावे. तसेच नागरिकांनी घराबाहेर पडू नये. तसेच घरी थांबून आपले आणि आपल्या कुटूंबाच्या आरोग्याची काळजी घेवून जिल्हा प्रशासनास सहकार्य करावे, असे आवाहन जिल्हा प्रशासनामार्फत करण्यात आले आहे.
****
