अहमदाबाद : गुजरातमध्ये १९ जून रोजी होणाऱ्या राज्यसभा निवडणुकीपूर्वी काँग्रेसमध्ये धक्कासत्र सुरूच आहे. गुजरातमधील काँग्रेसचे आणखी एक आमदार बृजेश मेरजा यांनी विधानसभा सदस्यत्वाचा राजीनामा दिला आहे. यापूर्वी काँग्रेसचे दोन आमदार अक्षय पटेल आणि जीतू चौधरी यांनी राजीनामा दिला होता. गुजरातचे विधानसभा अध्यक्ष राजेंद्र त्रिवेदी यांनी राजीनामे मंजूरही केले आहेत.
मार्चपासून ८ आमदारांनी सोडली साथ-
गुजरात काँग्रेससाठी हा संघर्षाचा काळ दिसत आहे. कारण, एकानंतर एक आमदार पक्षाला रामराम करत आहे. मार्चपासून आतापर्यंत काँग्रेसच्या ८ आमदारांनी राजीनामे दिले आहेत. गुजरातमध्ये काँग्रेसचे आता केवळ ६५ आमदार उरले आहेत. गुजरात विधानसभेच्या १७२ जागांपैकी १० जागा रिकाम्या आहेत. गुजरातमधील राज्यसभेच्या चार जागांसाठी १९ जूनला निवडणूक होणार आहे. यापैकी तीन जागा सध्या भाजपकडे आहेत, तर एक काँग्रेसकडे आहे.
- राजीनामा सत्राचा भाजपला फायदा-
राज्यसभेच्या चार जागांसाठी भाजपच्या तीन आणि काँग्रेसच्या दोन उमेदवारांनी अर्ज दाखल केला आहे. आतापर्यंतच्या समीकरणानुसार, भाजपला फक्त दोन जागा जिंकणं शक्य होतं. पण काँग्रेसच्या ८ आमदारांनी राजीनामे दिल्यामुळे तिसऱ्या जागेवरही भाजपचं पारडं जड मानलं जात आहे. आता चौथ्या जागेसाठी इतर आमदारांची मतं महत्त्वाची असतील. विधानसभेच बीटीपीचे दोन, राष्ट्रवादी काँग्रेस एक आणि एक अपक्ष उमेदवार जिग्नेश मेवाणी यांचा समावेश आहे. काँग्रेसच्या नजरा आता या आमदारांवर आहेत.
- राष्ट्रवादीतही उलथापालथ-
शरद पवार यांच्या राष्ट्रवादी काँग्रेसच्या प्रदेशाध्यक्षपदावरुन दिग्गज नेते शंकरसिंग वाघेला यांची हकालपट्टी करण्यात आली आहे. आगामी स्थानिक आणि विधानसभेच्या पोटनिवडणुकांमध्ये स्वतःचे उमेदवार उभे करणार असल्याचं वाघेला म्हणाले. राष्ट्रवादीचे गुजरातमधील एकमेव आमदार कंधाल जाडेजा हे १९ जूनला कुणाला पाठिंबा देणार यावरुन वाघेलांविरोधातच गट तयार झाला होता. त्यामुळे निवडणुकीपूर्वीच वाघेला यांची हकालपट्टी करण्यात आली. आता पक्षात थांबणं शक्य नसून काँग्रेस, भाजप आणि राष्ट्रवादीच्या पाठिंब्याविना उमेदवार उभे करणार असल्याचं ते म्हणाले.
***
